AN KATUKDOAN

Igwang sarong paralitiko na dinalaw nin mga Kristyano. Naki-istoryahan sinda. Pinagirumdom sya kun gurano karahay an Dyos. Kan nagpaaram na, nagsabi an mga bisita: ipapangadyi mi pirmi ika. Simbag kan paraltiko: kun gusto nindo talagang magtabang, hugasan muna nindo an saindong kinakanan.

An ebanghelyo ngunyan dapit sa pagpalayas ni Jesús kan demonyo sa sarong lalaki. Nagkapira an mga adal na pwedeng manudan.

Enot, si Jesús sarong marhay na marketing agent. Gabos na sinagoga gusto nyang malaogan. Sosog ki San Markos, 17 na beses sya naglaog sa sinagoga. Ini an inaapod na operation saturation. Siring man kaini an dapat nyatong gibohon. An gabos na medyos dapat gamiton tanganing ibalangibog an marhay na bareta.

Ikaduwa, si Jesus nagtukdo na may kapangyarihan. Mayong binabanggit si San Markos kun ano an katukduan nin Kristo. Kasalan ini ni Pedro na iyo an binasehan kan mga sinurat ni San Markos. May katibaadan na si San Markos aki ni Pedro. Si Pedro, huli sa edad, maluya na an memorya. No read, no write pa! Posibleng dai nya nagirumduman an mga detalye kan katukduan.

Alagad, sosog sa ebanghelyo, an katukduan ni Jesús nakakapatanyog kan puso nin saiyang mga paradangong. Asin nagtutukdo sya na may kapangyarihan, laen sa mga eskriba. An mga eskriba nagsasabi: susog ki Rabbi… Kita man na mga aliping sa gigilid masabi man nin siring: sosog sa CBCP, sabi kan obispo, sabi ni titser. Bako ini an estilo ni Jesús. Sya minasabi: Amen, amen, sinasabi ko saindo…

Ikatolo, si Jesús tawong may aksyon. May sarong sinaniban nagdulok mantang sya nagtataram pa. Si Jesus dai nagtuyaw: “hoy, bastos ka.” Dai man sya nagsabi: “pagkatapos na sana kan diskurso ko.” O “duman ka muna sa mga apostoles, sabihon mo an saimong mga simtomas.” Dai. Kundi, tulos-tulos saiyang binulong. digdi pinapaisi sa sato na may pagmakulog si Jesús bako sana sa satong kalag, kundi pati sa satong hawak. Bilog na tawo an saiyang namomotan.

May mga nagsusulot na T-shirt na may tatak: Bikolano ako. Siring kaiyan, ibalangibog ta man an marhay na bareta, alagad bako sana sa tataramon, kundi pati sa aksyon. Dai ta pag-arugon idtong mga Kristyanong nagdalaw sa paralitiko.

Sosog ki Charles Dickens, mayong tawong inútil kun sya nakakapagian kan buhay nin iba.