|
Written by Fr. Wilmer Tria
|
|
Sunday, 05 February 2006 |
An Kahulugan kan Pagtios
Ano an kahulugan kan pagtios? Tano ta dapat kita magsakit? An kasimbagan sa apto na ini makukua sa enot na babasahon, sa istorya ni Job. Aram ta na si Job sarong banal na tawo, maimbod asin matanos. Huli kaini, benendisyonan sya nin dakul na kayamanan.
Alagad, sa tahaw kan mga karahayan na ini, biglang buminirik an doros asin sya tinamaan nin sunod-sunod na kamalasan. Nalugi an saiyang negosyo, nawara an saiyang pamilya, binayaan sya kan saiyang mga katood, asin tinamaan sya nin makuring helang.
Huli kan mga ini, si Job nag-agrangay sa Dyos. Sya nakapagsabi: “An sakong pagtios labi pa sa kaya kong pasanon. Dai ako makaturog. Dai na liwat mahihiling kan sakong mga mata an kaogmahan.” Tinumang ni Job an Dyos asin dinudahan an saiyang karahayan. Kaya, sa katapusi, hinapot sya nin Dyos: “kun dakul an saimong naaaraman kun kaya ika nagdududa sa sako, haen ka kan linalang ko an kinaban? Tano ta naghihiro an kalangitan, an saldang asin an bulan? Nagtabang ka kan linalang ko an mga balyena?” Dangan, naagimadmadan ni Job kun guranong kasusupgan an pagtumang sa kadunongan nin Dyos.
An inagrangay ni Job siring man sa sato kun kita tinatamaan nin makuring pagtios, nin mga sunod-sunod na kamalasan. Kita nakakapag-isip: “Tapos na an sakong kinaban. Dai ko na liwat mahihiling an kaogmahan.” Sa pagtunga kan mga kamatean na ini, girumdumon ta an pangyayari ki Job.
Ano nanggad an katuyuhan kan pagtios nin tawo? Ini pagirumdom na an kaogmahan bako sanang kinabanon kundi langitnon. An katuyuhan kan satong buhay sa kinaban iyo an pag-andam sa paglakbay pasiring sa kahadean nin Dyos.
Sosog ki Albert Camus, an pagtios kaipuhan tanganing madukhayan ta an tunay na sarig asin isog nin satong boot. An tawong matinios, sa dalan an lakaw matanos.
|
|
Last Updated ( Thursday, 27 April 2006 )
|
