An Daoton

An ebanghelyo ngunyan saro sa pinakamakolor na istorya sa bibliya. Siring sa Beauty and the Beast kun saen an makanos na bakulaw nagin sarong gwapong prinsipe, an makatakot na daoton nagin sarong gwapong lalaki na may makinis na kublit.

An daot sarong helang na mayo nin kaomayan. An kahulugan kaini iyo an kawaran nin paglaom. An tawong tinamaan nin daot nakaabot na sa buhay na mayong saysay, mayong kahulugan, mayong padumanan.

Alagad, an helang bako sanang kawaran nin paglaom kundi makuring pagtios. Siring sa mga may helang nin kanser asin AIDS, makuri an pagtios kan mga daoton, bakong sanang pisikal kundi emosyonal.

An helang na daot nakakaulakit. Kaidtong panahon, an mga daoton legal na pinagdedeklara na maati. Ini an dahilan kun tano ta sinda sinusuway sa komunidad. Bawal sainda an pag-agi sa mga tinampo. Dapat sinda nakasulot nin gising bado, dai tahob an lalawgon asin may saklay sa liog nin kampanilya bilang patanid sa mga tawong mayo kan siring na helang.

An lalaking ini sa ebanghelyo naglapas kan batas nin kalikasan asin batas nin tawo. Batas nin kalikasan huli ta dawa maluya na an saiyang lawas, ginamit nya pa an natatadang kusog tanganing mahiling sana si Jesús. Batas nin tawo nin huli ta pinagbabawal sa saiya na magrani sa mga tawo, alagad sya nakisuksukan pa sa sainda tanganing mahiling sana si Jesús.

“Kun boot mo, malilinigan mo ako.” Siring sa sato, sa kamawotan nyang mabulong, nakapag-andam sya nin halawig na patararatara. Kun kita may mga hinahagad na pabor, pinapagayon ta an satong pagplatika. Sa kumpisalan, imbes na kasalan an itinutuga, kadakul-dakul na mga dahilan an sinasabi. Nangyayari ini nin huli ta gusto ta na magin magayon sa atubang nin iba.

“Kun boot mo, malilinigan mo ako.” Sa momentong nahiling nya si Jesus, nalingawan nya an gabos nyang boot sabihon. Naqkukutab-kutab an daghan, an saiya sanang nasayod: “kun boot mo, malilinigan mo ako.” Asin an mga tataramon na ini nagin saro sa mga makapangyarihan na pangadyion. Si vis, potes me mundare.

Gabos kita mga daoton. Iba-iba sana an grado. Gabos kita igwa nin ekspiryensya nin kawaran nin paglaom, makuring pagtios, pagkasuway sa mga tawong namomotan nyato. Alagad, siring sa daoton, dai kita mag-alangan sa pag-ako kan siring na kaluyahan. Dai na maghalat. Tolos magdulok sa Kagurangnan asin sayodon an mga tataramon: “kun boot mo, malilinigan mo ako.”