An Kapangyarihan sa Pagkaburunyog

Amay na pagkaaga, pano an harong kun saen si Jesus nagtutukdo asin nagbobolong nin mga may helang. An bilog na banwaan yaon sa harong na idto. Asin an mga eskriba nakisuksukan man sa pagtiktik kan saiyang mga sinasabi.

Igwang apat na kalalakihan may bitbit na paralitikong amigo. Kan dai makalaog huli ta pano nin mga tawo, suminakat sa atop, linabot, binuligan paitaas an amigo asin tinunton duman mismo sa tungod ni Jesus.

Tulos-tulos, nahiling ni Jesus an saindang pagtubod. Pinatawad an kasalan kan paralítiko, pinabuhat asin pinalakaw, bitbit an saiyang higdaan.

Kaipuhan nin tawo an kapangyarihan. Kun mayong kapangyarihan, mayo syang mahahaman. Kun igwa man, iyan talimatam o bakong marhay an pagkahaman.

Sa ebanghelyong binasa, manunudan ta an sarong klase nin kapangyarihan, an kapangyarihan sa pagkaburunyog.

An kapangyarihan sa pagkaburunyog mahihiling nyato sa apat na mga lalaki na nagdara kan paralítico ki Jesus. An paralítiko dai makatrabaho, dai makahanap-buhay. Kaipuhan syang atamanon kan saiyang mga katood. Dai ngani sya makaluto asin makahungit nin sadiri. Totoong makuri an pagtios nya. Salamat sa pagmakulog kan apat na amigo. Kan saindang madangog an pag-abot nin Kagurangan, dai nagsayang nin oras. Dai nag-alangan. Dai na nagpahumapot pa kun pwedeng laboton an atop. Ginibo an gabos tanganing matapos na an pagtios kan saindang katood.

An kaburunyugan dai nanggad mangyayari kun mayo nin pagmakulog. An pagmakulog iyo an pakidumamay sa kulog o sa pagtios nin kapwa.

Mamundo an mga trahedya na nangyari sa satong nasyon ngunyan. Stampede sa Ultra, dangan landslide sa Leyte. Alagad, mas mamundong pagdangugon an sinasabi kan ibang bagul na an pagmate na binabasol pa an mismong mga biktima kan trahedya. Sinda mayo nin trabaho, nagtuturog na mayong kinakan. Asin an saindang pagmati iyo na sinda kagabatan para sa iba.
Sa ngunyan, garo mayo kitang magiginibo. Alagad kun may pagmakulog kita, dakul an pwede nyatong gibohon tanganing makatabang asin tanganing maiwasan an siring na mga trahedya. An pagmakulog susi sa kapangyarihan nin pagkaburunyog.