Sa Puso Nakasurat

An enot na babasahon ginuno ki Propeta Osea. Midbid nyato sya sa awit kun Kwaresma: Balik kamo sako, kaiba an bilog nindong puso.” An saiyang buhay napapalaen sa ibang mga propeta nin huli ta an laman kan saiyang katukdoan iyong gayo an saiyang ekspiryensya sa buhay. Pinaagom sya sa sarong pampam, asin minoot nya dawa padagos an saiyang agom sa saiyang mandatang gibo. Siring man kaiyan an saiyang mensahe. Dawa kita padagos na dai nagigin maimbod sa Dyos, an Dyos padagos na namomoot sa sato.

“Dadarhon ko sinda sa disyerto,” sabi nin Kagurangnan. An Kwaresma na mapoon na sa Myerkules nin Abo, iyo an pagsagibo-liwat kan dinara nin Dyos an mga Isrealita sa disyerto, hale sa kaoripnan sa Ehipto. Duman pinakakan nya sinda nin tinapay, asin pinahiling nya an saiyang pagkamoot sa sainda. Idto na mga aldaw na nagimata sinda giraray sa pagkamoot nin Dyos.
Dai nanggad an Dyos masuko sa Israel dawa sinda bakong maimbod sa saiya. Siring man kaiyan an Dyos sa lambang saro sa sato. An saiyang pagkamoot labi pa sa kayang marurop kan satong isip.

Sa ebanghelyo, hinahapot si Jesus kun tano ta dai sya asin an saiyang mga disipulos nag-aayuno. Simple an saiyang simbag: an bangkete nin kasalan na pinag-propesiya ni Osea nagpopoon pa sana. Panahon nin pagpintakasi. Tano ta maayuno tulos?

Sa surat man ni San Pablo, hinahapot man sya kun tano ta dipisil an mga hinahadad ni Pablo sa mga tawo sa Korinto? Nagrerebelde an mga tawo duman sa saiya. Hinahagadan sya nin surat nin rekomendasyon hali sa doseng apostoles ni Kristo. Simbag ni Pablo: dai kamo maghanap nin rekomendasyon, kundi hinanyugon nindo an saindong puso.

An surat ni San Pablo para sa partikular na mga komunidad. Siring man kaiyan an mga surat kan Santo Papa o kan mga obispo. Alagad, an mensahe nin Dyos nakasurat na sa satong mga puso. Dapat lang nyatong hinanyugon. An pagtubod asin an mensahe nin Dyos nakasurat na sa satong puso kan kita nag-ako kan sakramento nin bunyag.

Mayaman o tios, yaon na sa satong puso an kaipuhan tanganing kita makaligtas. Iyan totoo kun yaon sa satong puso si Jesukristo. Papabayaan kaya kita nin satong Kagurangnan? Dai nanggad! “Aagomon ko kamo sagkod pa man” sabi sa enot na binasa. Si Jesus na satong esposo yaon sa tahaw nyato ngunyan. Punan nyato an pagpintakasi kan satong buhay!