An Kwaresma

Yaon na kita sa panahon nin Kwaresma. Ini sarong pag-andam para sa dakulang selebrasyon kan Simbahan, an pagkabuhay-liwat ni Kristo. Laen sa Adbyento, an selebrasyon na ini pano nin mga gawe nin penitensya arog kan pag-ayuno asin pag-abstinensya.

An Kwaresma kabaing kan desyerto kun saen dinara nin Dyos an mga Isrealita hale sa kaoripnan nin mga taga-Ehipto. Asin siring man sya sa desyerto kun saen si Jesús sinugutan kan demonyo. Sa desyerto mayo nin pagkakan asin inomon. Alagad an Dyos an nagtao nin tubig asin nin tinapay na hale sa langit. Sa desyerto yaon an demonyo sa pagsugot, alagad yaon man an biyaya nin Dyos na panglaban sa sugot. Ini an mga ekspiryensya sa laog nin Kwaresma. Pagkagutom, pagsugot asin biyaya nin Dyos.

Ini panahon sa paghorop-horop kan satong mga kasalan. An satanas Hebreyong tataramon asin an dyablo Griyegong tataramon. Pareho an boot sabihon kaini: kaiwal. An tawong dai midbid an kaiwal mayong laban sa kaiwal.

Sosog ki San Agustin, an kasalan pagtalikod sa Dyos asin paglingkod sa mga linalang. Boot sabihon, igwang duwang pangyayari sa pagkakasala: an pagtumang sa Dyos asin an pagsamba sa mga kinabanon na bagay.

Halimbawa kaini iyo an buhay sa banwaan. May kasabihan na kung may pulis, may trapik. Siring man, kun may pulitiko, mayo nin asenso. An duwang tataramon na ini hali sa Griyegong tataramon na ‘polis’ na an boot sabihon ‘dapit sa banwaan.’ Kun kaya, an pulis nagtataong paz y orden sa banwaan asin an pulitiko iyo an guro kan mga tawo tanganing sinda magin marhay na myembro nin banwaan.

Alagad, huli kan kasalan, an pulis an nagdadara nin karibokan sa banwaan asin an pulitiko iyo an nagtutukdo nin paghabon sa banwaan. Tinalikdan an pagsamba sa Dyos asin paglingkod sa banwaan asin sinamba an dyablo asin linupigan asin hinabunan an banwaan. Ini mangirhat na pagkakasala. Asin gabos kita igwang parte sa kasalan na ini huli ta kita an nagbugtak sa sainda sa saindang mga pwesto ngunyan.

Ano an dapat gibohon sa sugot? May kasabihan: mas tinutulod, mas sinusugod. An tamang panglaban sa sugot iyo an pagbalik sa Dyos, paglingkod sa Saiya sa paagi nin paglingkod sa banwaan. Ini an katuyuhan kan Kwaresma.

Susog sa awit na The Rose: ‘an pangiturugan na takot maglakaw dai nanggad mapapangyari; an kalag na takot magadan dai nanggad makakanood na mabuhay.’ Dai kita matakot magpasiring sa desyerto. Midbidon an demonyo, labanan iyan sa tabang kan biyaya nin Dyos, asin magbalik-boot sa satong Kagurangnan.