Pangiturugan

An buhay nin tawo siring sa pagtulay sa alambre. Sa ibong, binubutong sya kan saiyang pangiturugan sa buhay. Sa balyo, kan saiyang mga limitasyon. Kan an Space Shuttle sa Amerika nagsabog tolong taon nang nakalipas, pakatapos na mag-ensayo an mga astronots nin labing sampolong taon, an gabos na pangiturugan nagpurak na garong abo sa kalangitan. Sabi kan sarong parasurat: life is a tension between dreams and human limitations.

Totoong an buhay nyato pano nin pangiturugan. Mas dakulang pangiturugan, mas dakula man an pagkatawo. Alagad, sa balyo kan mga pangiturugan na ini iyo an mga ekspiryensya nin kabiguan. An mga plano napupurnada, an mga pangarap nawawasak. Minsan, an karanasan matindi asin nakakadara nin krisis sa sarong tawo. Halimbawa kaini iyo an biglaan na pagkagadan kan saimong namomotan.

Tano ta nagtutulay sa alambre? Ini nin huli ta kadaklan kan satong mga pangiturugan mga naglalayog sa alapaap, katal sa daga. An mga ini siring sa naghahanap nin gapo na hahamilon tanganing sya magin Darna. O siring sa sarong kandidato sa Naga na nanunuga na kun sya magin Mayor, papaatopan nya an bilog na syudad. Kadaklan kan mga pangiturugan mga bunga nin pantasya.

Igwa man na mga pangiturugan na salungat sa kakayahan asin natura nin tawo. May mga sintunado na grabe an pangarap na magin mga parakanta. May mga gustong maging negosyante pero an lalawgon garo pirming inutangan. May mga lalaki na gustong magin babae. May mga pandak na gustong magin higante!

Igwa man nin mga pangiturugan na salungat sa misyon na itinao nin Dyos sa saiya. Mga estudyante na mas dakul pa an oras sa pagtambay kisa sa pag-adal sa eskwelahan. May mga pulis na imbes magprotehir kan namamanwaan, sinda pa an protektor kan mga drug lords asin jueteng lords. May mga artista na imbes magdrama sa pelikula, nagdradrama sa pulitika.

An ebanghelyo ngunyan dapit sa pagbagong anyo ni Jesus sa Bukid nin Tabor. Huli kan halipot na kamurawayan na nasaksihan ni Pedro, gusto nya nang magtugdok nin tolong harong-harong asin duman na sinda mag-erok. Idto an bukid nin pangiturugan. Alagad, pinukawan si Pedro ni Jesus asin sinabihan na dapat pa syang maglusad sa bukid an idto asin magtukad sa bukid nin pagtios, an bukid na inaapod Kalbaryo.

An Kalbaryo, an pagtios, an pagkabigo mga karanasan nin tawo tanganing mapatanos asin mapakarhay an saiyang pangiturugan. An mga ini nakakadara nin kapakumbabaan asin dakulang tabang tanganing ma-edit, mapakarhay asin mapagayaon an saiyang pangiturugan, pangiturugan na bakong makasadiri, bakong katal sa kinaban, bakong salungat sa saiyang kakayahan, asin bakong tumang sa pangiturugan nin Dyos para sa saiya.