An Buhay nin Boot

Aram ni Jesus kun ano an nasa isip nin tawo. Aram nya kun ano an yaon sa satong puso. Aram nya kun an sarong tawo totoong nagsasamba o nagsasagin-sagin sana.

Rumdom ko pa kan ako nasa elementarya asin kan enot kong pagbali sa choir. Kan nagmumyusik praktis na, bukas sana ako nin bukas kan sakong nguso, nakapirong pa ngani, sa pagsagin-sagin na nagkakanta. Nasupog akong marhay kan madakop ako kan sakong titser.

Kun sa pagkanta ngani pwedeng magsagin-sagin, lalong-lalo na sa pagsamba. Ini an nariparo ni Jesus kan sya naglaog sa Templo. Tulos-tulos, nahiling nya an pagsagin-sagin kan mga tawo. Nahiling nya pa an pandadaya asin pang-aapi sa mga dukha. Asin dai nya ini natios. Nagkua nin pamakol, asin tumang sa satong imahinasyon kan saiyang kabootan, pinalayas nya an mga pararibay nin kwarta asin tinurumba an saindang mga lamesa sagkog na magkaurula an mga kwarta sa salog.

Ano an totoong nangyayari duman sa Templo? An mga tawo bukas-palad sa pagtao nin donasyon sa Templo. An saindang itinatao katumbas nin duwang bulan na sweldo o dyes pursyento kan bilog na sahod sa sarong taon. An mga peregrino hale pa sa ibang-ibang lugar, dahilan kun tano ta kaipuhan nin mga pararibay nin kwarta. Dai inaako an ibang moneta kundi an Shekel sana. Alagad an mga pararibay mga madaya. Sinda mga parahabon. Ginugulangan dawa na mga dukha na boot man na magtaong donasyon sa Templo. Digdi naungis si Jesús. Digdi naging byolente an satong Kagurangnan.

Ano an tamang pagsamba? Sabi kan sarong monghang makata, an ngirit panluwas na kapahayagan kan panlaog na kaogmahan. Siring man kaini an pagsamba. An mga rito asin ritwal, an seremonya asin liturhiya, mga panluwas sanang manipestasyon kan panlaog na pagsamba sa Dyos. Sa madaling sabi, mayo nin kahulugan an pag-ayuno, an pagdupa-dupa, an pagdara nin burak asin paghadok sa imahen, an pag-insenso asin dakul pang iba, kun bako iyan totoong kapahayagan kan tunay na boot nin tawo na nagsasamba sa Dyos.

Yaon na kita sa katahawan kan Kwaresma. Hagad sato nin Dyos na tawan tang halaga an buhay kan satong boot. An peligrong tawan sana nin halaga an mga panluwas na manipestasyon nagdadanay sa buhay nin mga Kristyano. Nagsasamba alagad nang-aapi nin kapwa. Alagad, ini dapat na bagohon. Pahalagahan an panlaog na pagsamba sa Dyos tanganing maging makahulugan an ano man na gibo nyatong panluwas na penitensya ngunyan na Kwaresma.