An Kagadanan Nagtataong Buhay

An mga hade sa Ehipto nadukhayan sa mga piramide na nagwalat nin mga bulawan asin iba pang mga kayamanan, alagad sinda gadan asin dai na nagigirumdoman. Si Jesus naghali na dai nagwalat dawa sarong bronseng singsing, alagad nabubuhay sa lambang saro sa sato. Tano ta siring? An simbag yaon sa ebanghelyo ngunyan.

An mga kaulay ni Jesus mga Griyego. An mga Hapon o mga Koreano sato ngunyan iyo an mga Griyego kadtong panahon sa Jerusalem. Sinda an may kwarta. Sinda an may kakayahan na magparabyahe. Sinda an may hilig na makaparong nin bagong duros sa ibang lugar asin makasa-ngap nin mga bagong ideya.

Paskwa kaidto sa Jerusalem. Dakul an mga turista. An mga Griyego idtong mga nagparibay nin kwarta sa templo. Nahiling ninda kan si Jesús nagwala sa templo. Nadangog ninda an mga milagro na ginibo ni Jesús. Gusto nindang madangog si Jesus. Aram ninda na an siring na klase nin tawo dai malawig an buhay. Dapat syang tawan nin panahon asin halaga.

An dinulok ninda si Felipe. An Felipeng pangaran Griego. “Bosing, gusto ming makaulay si Jesús.” Alagad natakot magtaong desisyon si Felipe. Sinda kaya mga dayuhan. Mayo pa nin appointment.

Pinasa ni Felipe an trabaho ki Andres. Mas marhay na sekretaryo si Andres. Aram nya na si Jesús may panahon para sa gabos. Dai nya kaipuhan an appointment.

Tolos-tulos, sinabat ni Jesus an mga turista, inalok na magtukaw asin nagsabi si Jesús: “Kagadanan sana an nagtatao nin buhay!” Natikbahan an mga Griego sa saiyang sinabi, alagad tulos ginamit nya an simbolismo kan banhi tanganing ipaliwanag an saiyang sinabi. An banhi kaipuhan ilubong sa daga, kun dai, dai sya matalubo asin mabubuhay.

Sa madaling sabi, kun an satong buhay dai gamiton para sa paglingkod sa kapwa, dai sya magkakaigwa nin buhay.

An kasaysayan pano nin mga halimbawa kan mga ini. An mga martir asin mga santo nin Simbahan arog ki San Pedro asin San Pablo, o ki Maximiliam Kolbe, o ko Joan of Arc, o ki San Lorenzo Ruiz de Manila. O siring ki Mother Teresa o ki Santo Papa Juan Pablo Segundo. Sinda mga halimbawa kan mga tawo na nagdusay kan saindang dugo asin buhay para sa kapwa.

An kagadanan nagiging burabod nin buhay. An tawong habong magtrabaho tanganing parating makinis an kutis, habong mag-isip tanganing dai magkurundot an angog, mabubuhay na halawig alagad an saindang buhay mayo nin kahulugan asin kaogmahan. Alagad an tawong nagdudusay kan saiyang sadiri para sa kapwa nabubuhay sagkod pa man.

An mga imperyo na minukna sa paagi nin pwersa nagwalat nin mga gira nin kamundoan, kapaitan, kaangotan – siring kan imperyo ni Alejandro Magno kan Imperyo Griyego, ni Genghis Kahn kan Imperyo nin Mongolia, ni Hitler kan Alemanya, ni Saddam kan Iraq. Alagad an kahadean na minukna ni Jesus sa paagi nin kagadanan sagkod ngunyan nabubuhay sa bilog na kinaban.