|
An Semana Santa Igwang survey na ginibo para maaraman kun ano an logo o simbolo na pinakamidbid sa bilog na kinaban. Sisay an gustong maghula? Sosog sa survey, an pinakamidbid iyo an logo kan World Olympics, idtong may limang hula hoop. 92 pursyento sa bilog na kinaban an nakakaaram kan simbolong ini. An ika-duwa iyo an Shell Company asin an McDonalds. Igwang 88 pursyento an nakakaaram kaiyan. An krus na simbolo kan mga Kristyano igwa sana nin 54ng pursyento. Boot sabihon, maluya pa an satong marketing strategy. Dakul pa kitang dapat na gibohon. Si Rembrandt igwa nin painting na an ladawan iyo an krusipiksyon. Sa ladawan na idto, nakaguhit si Jesus na nakapako sa krus, pano nin lugad, asin sa pamitisan iyo an mga suldados asin mga kaiwal ni Jesus. Sa dai gayong risang lugar, yaon man an sarong lalawgon, an lalawgon mismo ni Rembrandt. An saiyang paliwanag iyo ini: na huli kan saiyang kasalan, kabilang sya duman na dahilan kan pagtios nin Kagurangnan. Sosog sa mga Bible Scholars, an Pasyon nin Kagurangnan iyo an pinakadetalyadong surat dapit sa buhay ni Jesús. An paliwanag iyo na pagkagadan ni Jesus, an enot na ginirumdom ninda iyo idtong mga huring aldaw kan Kagurangnan. Asin an mga detaleying ini an enot na sinurat kan mga ebanghelista. Kun si Jesus nabuhay nin 33 na taon sa kinaban, igwa sya nin dose mil na aldaw. Sa dose mil na iyan, 100 sana an may istorya sa bibliya. Asin sa 100 na iyan, an pitong huring aldaw iyo an pinakapano nin detalye. Saro sana an boot sabihon kaini: An Pasyon nin Kagurangnan iyo an pinakamahalagang istorya asin an Semana Santa an pinakamahalagang semana sa bilog na taon. Hagad sato na pakinabangan tang marhay an mga benepisyong kabanalan kan Semanang ini. Makiiba kita sa mga Hudiyo na nagkurahaw na ‘Hosana sa Aki ni David.’ Magsolsol kita kan kasalan asin magkumpisal tanganing an siring na kurahaw dai magin kurahaw nin pagtuya-tuya sa Kagurangnan. Siring sa mga nagralaog sa mga sinagoga sa pagdangog sa satong Kagurangnan, kita man mag-atender nin mga rekoleksyon sa satong mga parokya. Sa Huwebes, minukna ni Jesús an Eukaristiya. Makinabang kita sa pag-ako kan banal na komunyon. Sa Byernes, dai kita masabi: ‘Thanks God its Friday.’ Mayo nin gimik, mayo nin bucket, mayo nin crispy pata, mayo nin ‘My Way’ asin Pinoy Big Brother na baraylihan. Ini nin huli ta an Byernes na ini iyo an pinaka-solemne sa gabos na Byernes. Ini an aldaw na kita ilinigtas nin Kagurangnan sa pagpabulos kan saiyang sadiring dugo. Pagkatapos kaini sana kita makakapagsabi: ‘Thanks God, its Easter Sunday!’ An Semana Santa pano nin mga benepisyong kabanalan. Ini an kasaysayan kan buhay nin pagtios ni Jesús. Ini sato man na dapat agihan tanganing makamtan ta an buhay na daing kasagkoran.
|
