AN MARHAY NA PASTOR

Ngunyan na ika-apat na Domingo kan Pagkabuhay-liwat ni Kristo, kita inaalok sa sarong paghorop-horop ki Jesus bilang an Marhay na Pastor. Sa ebanghelyo, ikinukumpara nya an saiyang sadiri sa Marhay na Pastor na napapalaen sa sarong tinatandanan. An Marhay na Pastor igwang pagmakulog sa karnero. An tandanan kwarta sana an lamag.

Sa Galilea ngunyan, huli kan pag-uswag kan panahon, dakul na an nagbago asin harayo nang marhay sa kamugtakan kan panahon ni Jesus. Alagad igwang lugar na sagkod ngunyan nakakaagid pa man giraray sa panahon ni Jesus. Ini an lugar kan mga pastor asin kan saindang mga karnero. Sa lugar na idto, igwa nin mga ampas, mga kalot, mga lugar na kun saen pwedeng magadan an mga karnero. Yaon man an presensya kan mga lobo asin iba pang mga maiisog na hayp. Huli kan kamugtakan na ini, kaipuhan man nanggad kan mga karnero nin tagapagbantay sa sainda. Kaipuhan ninda an pastor.

Kita gabos siring sa mga karnero. Kaidto sagkod pa man ngunyan, an satong inaagihan pano nin mga ampas, mga kalot, mga litag. Gabos ini mga peligro na kun saen an satong mga kalag pwedeng maribaraw, mawara, asin magadan. Garo kita mga sirkero na nagtutulay sa alambre. Kaipuhan ta an Marhay na Pastor.

Siring man, kita gabos inaapod na magin marhay na pastor para sa satong mga kapwa. An pastor igwa nin pagmakulog o pagmalasakit sa kapwa. Namamatean nya an saindang kulog, an saindang sakit. An pagmakulog bako sanang sarong emosyon, bakong sarong pagmate. Sya sarong konkretong aksyon.

Labi-labi an pangangaipo nin banwaan sa mga marhay na pastor. An mga padi panalmingan nin mga tawo sa kabanalan. Hinahanap ninda an mga padi na makakatao nin halimbawa nin banal na buhay. Dai sinda naghahanap nin mga intelihenteng padi, kundi mga banal na padi.

Panalmingan man nin mga estudyante an saindang mga maestro asin maestra. Dai sinda naghahanap nin mga henyong mga propesor, kundi nin mga guro na magtatao sainda nin panahon na makaibanan ninda sa pagtukdo kan mga dapat nindang manudan sa buhay.

An satong nasyon may dakulang pangangaipo nin mga lider sa banwaan na tataong magpahimutik sa sadiri tanganing maging bayani nin banwaan. Nakakamundo an labi-labing kurupsyon digdi sa satong nasyon huli kan mga raot na mga pulitiko.

Alagad, susog ki Fulton Sheen, na kurupsyon garo mga bula sa ibabaw kan maating tubig. Sa irarom kaiyan iyo an rinibong sararadit na bula. An mga pulitikong tampalasan iyo sana an nasa ibabaw kan maating banwaan, alagad sa irarom kaiyan iyo an mga pagkadakul-dakul na tawong iyo an dahilan kan saindang pagiging makinamkam.

Sa pagpapabago kan satong banwaan, mahalaga na kita magbakli kan satong mga mandatang ugali nin pangingikil, nin pagparapanghagad sa mga pulitiko, nin pagparasuporta sa mga bareta na pano man sana nin intriga, alagad mayo man nin katotoohan. Siring pa man, ipamibi nyato an satong mga lider sa gubyerno, an mga padi asin obispo, an mga magurang, mga titser – tanganing magampanan ninda an saindang mga katungdan bilang mga marhay na pastor kan satong banwaan. Asin an pinakamahalaga sa gabos iyo na kita mismo magin siring ki Jesus na sarong Marhay na Pastor.